零失敗蛋白杏仁茶食譜 孝敬媽媽



筆者媽媽以前經營糖水舖，每晚收舖之前, 都會為我親手炮製一碗「蛋白杏仁茶」。我每次都會堅持加多兩粒「家鄕湯圓」， 因為我認為呢個配搭係最完美嘅飯後甜品。

媽媽退休後，我好少有機會再食「蛋白杏仁茶」。好彩當時有偷師，今個母親節我決定倒轉角色，由我炮製簡易版嘅「蛋白杏仁茶」俾媽媽，一齊回味下舊時，同時滋潤一下。

「蛋白杏仁茶」通常用「南杏」配少少「北杏」嚟烹調，傳統糖水店一般會用石磨將佢哋磨碎。不過，現代家庭梗係無辦法用石磨啦, 所以我會先用攪拌器打碎材料至糊狀，再用魚袋隔渣。唔駛10分鐘，就可以輕輕鬆鬆將杏仁茶嘅材料處理好，幼滑同細緻嘅效果同石磨差不多。

南杏又名「甜杏」,潤肺香甜，含豐富蛋白質；而北杏又名「苦杏」，香味較濃但帶點苦。不過要留意嘅係，生嘅北杏有機會含有有毒物質，進食時一定要烹煮，而且唔可以多食。杏仁有增強免疫力同抗氧化作用，亦能滋潤美肌，今個母親節就一齊煮碗「蛋白杏仁茶」孝敬一下母親大人吧！

蛋白杏仁茶材料：

• 南杏 － 7両
• 北杏 － 1両
• 冰糖 － 40g
• 水 － 600ml
• 蛋白 － 2隻

蛋白杏仁茶做法：

1.南北杏清洗乾淨後，用水浸1小時，然後盛起備用

2.將南北杏加水，用手提攪拌器或者攪拌機攪成漿

3.放入魚袋隔渣

4.將格好嘅杏仁茶加冰糖煲滾

5.加入蛋白後立即熄火，攪勻便完成