舌尖去旅行家中自煮泰式風味單骨雞翼

香港人愛去旅行，平均每人一年去11次旅行，係全世界第一！相信好多半退休/ 退咗休嘅50後、60後，更加係trip接trip咁出遊。疫情之下，旅遊變得奢侈，與其懷念有得去旅行的日子，不如走入廚房，炮製泰式單骨雞翼，讓舌尖去旅行！

近年興起源於泰國

雞翼可算係最普通嘅食材，新鮮或雪藏都各有擁躉。雪藏勝在平，驚有雪味？只要出下水，咁就搞掂。最近有道雞翼菜式，都係雪藏貨，不過就紅爆主婦界，個個迫崩頭爭住入貨，人人上網鋪製成品呃Like，就係單骨雞翼囉。

唔信？你上Google打「單骨雞翼」搜尋一下，竟然彈出約4,450,000項搜尋結果，你冇眼花，係四百四十五萬呀！魚露單骨雞翼、鹽焗單骨雞翼、五香單骨雞翼、金沙骨單骨雞翼、酥脆蒜香焗單骨雞翼……做法五花八門，真係多不勝數。

單骨雞翼之所以咁受歡迎，實在要講一句：莎話啲卡。

係呀！呢種將雞翼一開為二嘅做法，最初係由泰國興起先，猶記得泰國人氣食肆Greyhound Café，年前推出招牌單骨雞翼後，迅即走紅，成為招牌食物，好多人去泰國甚至專登去朝聖，認真誇張。唔少店舖於是爭相仿傚，好似Kloset Café，就推出焦糖單骨雞翼，輕易成為話題。年前Greyhound Café分店開到香港，單骨雞翼登堂入室，荼毒港人，掀起第一波熱潮爆發。

就好似病毒一樣，有第一波，就有第二波。

唔用空氣炸鍋都整到

事隔幾年，當單骨雞翼新鮮感開始放緩，第二波熱潮再爆發。源頭又係嚟自泰國，泰國最大食品集團CP（Charoen Pokphand Group Co.），由泰籍華人謝易初和謝少飛氏兄弟於1921年創辦，是世界上最大的動物飼料，蝦生產商以及泰國頂級電信公司。香港人認識佢，當然係超市常見嘅泰國CP雞蛋，原來佢哋除咗雞蛋，仲有生產單骨雞翼。急凍，1KG一包，約45件，已經調味上粉，一炸就食得。賣係好賣，但本來都未到瘋癲狀態，將佢推上高峰，全靠近期大熱嘅空氣炸鍋。

因為空氣炸鍋，聲稱唔使用油都可以炸食物，零難度、超方便、又健康。於是造就唔少新手及貪方便主婦入廚，單骨雞翼就成為空氣炸鍋嘅最佳拍檔了。

講到呢度，口水多過茶。係時候入正題，今日就同大家炮製泰式甜辣單骨雞翼。我爭氣啲，唔用CP、唔用空氣炸鍋，唔使盲追潮流，一樣整到。