花雕醉雞卷食譜 零失敗開胃前菜

最近天氣咁熱，日日都30°C以上，難免無咩胃口。因此每逢夏天，我都一定會準備冷盤放喺雪櫃，開胃又解暑，而且相當易整。今次就同大家介紹其中一個我最鍾意嘅開胃涼盤 －－ 花雕醉雞卷，口感清爽又易煮。

好多時街外食到嘅醉雞都會用雞翼、雞胸肉等，但係我就鍾意用食起嚟啖啖肉嘅無骨雞髀肉。雖然市面上有現成嘅醉雞汁買，但係味道始終冇自己調配嘅醉雞汁咁香濃。其實自己調較唔係咁難，只需用紹興花雕酒混合玫瑰露酒，再配上少少藥材就可以喇，呢種汁香氣獨特，亦有補氣益血嘅作用。

醉雞卷聽落複雜，其實做法非常簡單，而且賣相亦相當吸睛。快啲按入內文睇下點樣整呢個零失敗花雕醉雞卷啦！

醉雞卷材料：

• 去骨雞髀肉 – 2塊
• 杞子 – 2湯匙
• 黨參 – 3片
• 紹興花雕酒 – 300ml
• 玫瑰露酒 – 50ml
• 鹽 – 少許
• 胡椒粉 – 少許

醉雞卷做法：

1.去骨雞髀肉洗淨抹乾，用少許鹽和胡椒粉醃製15分鐘；

2.紹興花雕酒加入玫瑰露酒、杞子和黨參，煮滾，熄火蓋上蓋，焗30分鐘，然後放入玻璃密室器皿內待涼；

3.將醃好的雞髀肉捲起，再用錫紙裹成雞卷；

4.燒一鍋水，水滾後放入雞卷，轉細火蓋上蓋，繼續煮40分鐘；

5. 取出雞卷，將錫紙拆掉，然後將雞卷滲出來的雞汁留起，加入已煮好的花雕酒內；

6.將煮好的雞卷放進紹興花雕酒內浸過夜，翌日切件後便可享用。